Бэрт- Ууһун нэһилиэгэр кэрэ аӈардарга анаан бырааһынньыктааҕы тэрээһин буолан ааста.

Кулун тутар 6 күнүгэр А. П. Иванов аатынан норуот айымньытын киинигэр сааскы маннайгы бырааһынньыгын, Аан дойду дьахталларын күнүгэр нэһилиэк эр дьоно кэрэ аӈардарбытыгар анаан аан тыллаах баһылык солбуйааччыта Василий Дмитриевич Явловскай эҕэрдэлээн тыл эттэ, Андрей Васильев, Лаврентий Тарскай ырыа бэлэхтэрин анаатылар. Ол кэннэ көрдөөх-нардаах, 8 түһүмэхтээх күрэх түһүлгэтэ тэриллибитигэр нэһилиэкпит тэрээһиӈӈэ кэлбит 54 кэрэ аӈара кыттан илин- кэлин түһүстүлэр.
«Киинэни таайыы«, «Рокатканан ытыы«, «Хабылык«, «Лото», «Мээчиги быраҕыы«, «Хорм хол«, «Дарст«, «Орел и Орешка» курдук интириэһинэй күрэхтэр буоллулар. Бу күрэхтэһиигэ саамай элбэх очукуону ылан Чыпчаал кыайыылааҕынан ааттанна Евдокия Петровна Черкашина уонна аэрогриль бирииһинэн наҕараадаланна , иккис миэстэ Евдокия Федоровна Олесова ылан мультиварка хаһаайката буолла , үһүс бириистээх миэстэҕэ Любовь Леонидовна Горохова тиксэн блендер бирииһинэн наҕараадаланна. Бу дьоро киэһээ тэрээһинигэр бастакы ыалдьытынан Лена Илларионовна Винокурова кэлэн Валерий Дмитриевич Стручков туруорбут бирииһин хаһаайкатынан буолла . Бу киэһээ «Саамай Аҕа саастаах ыалдьыт» диэн анал аакка игирэ эдьиий балыс Мария Антоновна Филиппова уонна Акулина Антоновна Местникова буоллулар. Уонна «Саамай эдэр ыалдьыт» диэн анал ааты киһи сөҕүөн -махтайыан эмиэ игирэ эдьиий балыс Татьяна Дмитриевна Боярова, Анна Дмитриевна Иванова тиксэннэр кэлбит дьону, тэрийээччилэри үөртүлэр. Уонна түмүгэр үгэскэ кубулуйбут минньигэс астаах остуол тула сэһэргэһэн, үӈкүүлээн дуоһуйа сынньанан, астынан тарҕастылар.
А. П. Иванов аатынан норуот айымньытын киинин аатыттан тэрийбит, кыттыспыт нэһилиэкпит эр дьонугар Барҕа Махталбытын тиэрдэбит.