Бэрт-Ууһун нэһилиэгэр Үлэ Геройун Готовцев Михаил Николаевиһы кытта көрсүһүү

Үлэнэн Герой буолаллар
Сахабыт чулуу дьонноро,
Алмаастыы чаҕылхай холобур
Үлэнэн толору дьоллонон!
Бүгүн, кулун тутар 5️⃣ күнүгэр Бэрт-Ууһун нэһилиэгэр Танда бөһүөлэгин олохтооҕо, Үлэ Албан аат орден толору кавалера, Үлэ Героя, Готовцев Михаил Николаевич 8️⃣0️⃣ сааһынан Десант «ЭСТАФЕТА ТРУДОВОЙ ДОБЛЕСТИ» тэрээһин буолла. Тэрээһин бастаан
И. С. Портнягин аатынан Сыырдаах орто оскуолатын актовай саалатыгар үөрүүлээх аһыллыыта буолла. Тэрээһиӈӈэ оскуола оҕолоро, үлэһиттэрэ, нэһилиэк дьоно- сэргэтэ сырыттылар. Онтон кылаас чаастара, маастар-кылаастар буоллулар:»Рисование воском и акварелью» остуол оонньуута «Убаһалаах«, «Роспись по гипсу» курдук сүрдээх үчүгэй тэрээһин буолла.
Онтон А. П. Иванов аатынан норуот айымньытын киинигэр Үлэ Геройун М. И. Готовцевы кытта үөрүүлээх көрсүһүү буолла. Михаил Николаевич 8️⃣0️⃣ сааһынан нэһилиэк дьаһалтата баһылык Ильин И. П., А. П. Иванов аатынан норуот айымньытын киинин уус-уран салайааччыта Черкашин В. П. эҕэрдэлээн туран сэмэй бэлэхтэрин туттардылар. Байаҕантай нэһилиэгин солбуйар баһылыга Готовцев А. В. харда тылын эттэ.
Сэһэн Ардьакыап аатынан улуус түмэлин уонна Бэрт-Ууһун киэн туттар Геройдарын, бастыӈ үлэлээх, олорон ааспыт дьоммутугар аналлаах быыстапка турда. Быыстапканы олохтоох библиотекарь Парникова П. Е. туруорда. Ырыа- тойук аргыстаах Олоӈхо дьиэтэ этнокултуурунай киин специалиһа Алена Давыдова, Мария Портнягина, Кондратий Герасимов кэрэ куоластарын бэлэхтээтилэр. Үөрүүлээх аһыллыы, көрсүһүү кэнниттэн төгүрүк остуол тула ирэ- хоро кэпсэтии буолла. Төгүрүк остуолга биһиги нэһилиэкпит аҕам саастааҕа, «Көмүөл» түмсүү салайааччыта Портнягин М. М., кулууп эдэр специалиһа Кондратий Герасимов боппуруос биэрэн кэпсэтиини өссө киэргэтэн биэрдилэр. Кэлбит ыалдьыттарга Михаил Николаевич бэйэтин санаатын эттэ, инникитин Бэрт- Ууһун нэһилиэгэ үүнэ- сайда турарыгар, тыа хаһаайыстыбата өссө чэчирии турарыгар баҕа санаатын эттэ. Үөрүүлээх тэрээһини иилээн- саҕалаан ыыттылар: Варвара Иванова, Пелагея Парникова. Түмүктүүр тылы улуустааҕы кырдьаҕастар советтарын председателэ Колодезников И. И. тылын, баҕа санаатын эттэ. Михаил Николаевичка Бэрт-Ууһун нэһилиэгин дьоно- сэргэтэ этэӈӈэ сылдьарыгар баҕа санааларын этэн тарҕастылар. Бүтэһигэр бары өйдөбүнньүк хаартыскаҕа хатаныы буолла.
Тэрээһиӈӈэ кэлбит бары ыалдьыттарбытыгар, Бэрт- Ууһун дьонугар, тэрийсибит дьоммутугар барыгытыгар Барҕа Махтал буоллун! Бары бииргэ, биир сомоҕо буолуоҕун!🙌🏻✊🏻✊🏻

А. П. Иванов аатынан норуот айымньытын киинин коллектива